«Həyat, ölüm və gözəllik» mövzusunda sərginin kataloqu dünya şöhrətli rəssamın əsərlərinin qayəsi haqqında dolğun təsəvvür yaradır

Xəbər verdiyimiz kimi, Heydər Əliyev Fondunun və Endi Vorhol Muzeyinin birgə dəstəyi ilə iyunun 21-də Heydər Əliyev Mərkəzində XX əsrin məşhur rəssamı Endi Vorholun əsərlərindən ibarət sərgi açılmışdır.

AzərTAc xəbər verir ki, sərginin açılışı ərəfəsində Heydər Əliyev Fondunun və Heydər Əliyev Mərkəzinin birgə layihəsi çərçivəsində dünya şöhrətli rəssamın əsərlərinin reproduksiyasını əhatə edən kataloq Azərbaycan və ingilis dillərində çapdan çıxmışdır.

Son dərəcə yüksək zövqlə hazırlanmış, nəfis tərtibatlı kataloqun ilk səhifəsi Heydər Əliyev Fondunun vitse-prezidenti Leyla Əliyevanın Bakıda dünya şöhrətli Amerika rəssamının sərgisinə dair fikirləri ilə açılır.

Heydər Əliyev Fondunun vitse-prezidenti Leyla Əliyeva bildirir ki, Azərbaycan qədim tarixi, adət-ənənələri ilə seçilən ölkədir. Burada müxtəlif mədəniyyətlər, Şərqlə Qərb sivilizasiyası, tarixlə müasirlik bir-birinə qovuşur.

Qədim ənənələri olan Azərbaycan bu gün həm də müasir incəsənət ölkəsi kimi tanınır.

Heydər Əliyev Fondunun vitse-prezidenti diqqəti son vaxtlar Bakının bir çox beynəlxalq tədbirlərə, müxtəlif sahələri əhatə edən konfrans, festival və yarışmalara ev sahibliyi etməsinə yönəldərək yazır: "Bu dəfə isə Bakı daha bir əlamətdar hadisə ilə diqqət mərkəzindədir. Azərbaycanda, Heydər Əliyev Mərkəzində ilk dəfədir ki, modern rəssamlıq tarixinə adını həkk etmiş Endi Vorholun əsərlərinin sərgisi keçirilir.

Tarixi ənənələri, mədəni irsimizi yaşadan Heydər Əliyev Mərkəzi bu gün müasir incəsənət layihələri ilə yanaşı, Şərq və Qərb mədəniyyəti arasında körpünün, yaranmasına, Azərbaycan mədəniyyəti və incəsənətinin dünyaya, eyni zamanda da dünya sivilizasiya nümunələrinin Azərbaycanda təbliğinə dəstək olur.

Bu baxımdan Endi Vorholun "Həyat, ölüm və gözəllik" sərgisi müasir incəsənəti tanıtmaq və yaşatmaq istiqamətində uğurlu layihədir.

Bir daha bütün sənətsevərləri bu sərginin keçirilməsi münasibəti ilə təbrik edirəm və inanıram ki, incəsənət sahəsindəki bu tarixi hadisə sizdə xoş təəssüratla yadda qalacaq".

Kataloqda Endi Vorhol Muzeyinin direktoru Erik Şinerin, sərginin kuratoru Cianni Merkurionun sərgiyə aid fikirləri də yer almışdır.

Nəşrdə Endi Vorholun həyat və çoxtərəfli yaradıcılığı, onun simvolik obrazlarının mahiyyəti, portretləri, avtoportretləri, müəllifin əsərlərində həyat, ölüm və gözəllik mövzusu haqqında məlumatlar, ümumilikdə, pop-art kralının baxışları haqqında zəngin mənbədir.

Endi Vorholun əsərlərinin Azərbaycanda ilk dəfə təqdimatından yaşanan həyəcanını dilə gətirən muzeyin direktoru Erik Şinerin fikrincə isə, sərgini ziyarət edənlər rəssamın kütləvi mədəniyyətə təsirini və "Amerika arzusuna" baxışlarını öyrənə biləcəklər. Sərgidə təkcə Endi Vorhol haqqında deyil, eyni zamanda, avanqard film, pop-art barədə də geniş məlumat əldə etmək mümkündür.

Sərginin təşkilinə görə Heydər Əliyev Mərkəzinə və Heydər Əliyev Fonduna təşəkkürünü bildirən kurator Cianni Merkurio əmindir ki, bu mərkəz gələcəkdə bir çox mühüm tədbirlərə ev sahibliyi edəcək və Bakını müxtəlif mədəniyyətlərin kəsişdiyi bir mərkəzə çevirəcəkdir.

Azərbaycan.-2013.- 23 iyun.- S.5.